Raúl Fernández, a polo Mundial de Abu Dhabi
Segundo comunica o Concello do Rosal, o noso veciño Raúl Fernández Lorenzo é novo Campión de España. Iso si, desta vez, a distinción é relacionada non co deporte, senón cos seus estudos, xa que “vén de proclamarse vencedor nas Olimpiadas Nacionais de Formación Profesional de 2017 levadas a cabo en Madrid. Un total de 8 alumnos e alumnas de Formación Profesional galega viron recoñecida a súa valía, e Raúl entre eles, na modalidade de CNC Torneado e fresado acadou a medalla de ouro“.
Dende a web municipal lémbrase que “Galicia presentou 25 competidores. Estes competidores son os gañadores das medallas de ouro da IV edición dos Campionatos Galegos da Formación Profesional Galiciaskills 2016, celebrados en Silleda no mes de novembro do pasado ano”.
Galiciaskills é o “Campionato Galego da Formación Profesional que se celebra cada dous anos e consiste no desenvolvemento dunha serie de competicións relacionadas coas distintas especialidades da formación profesional, nas que os participantes teñen que demostrar a súa competencia profesional e medir as súas destrezas con alumnado de distintos centros de Galicia na realización das correspondentes probas”.
O alumnado gañador de cada competición, segundo afirma o ente rosaleiro, “participa no Campionato Nacional Spainskills e as medallas de ouro deste campionato participarán posteriormente no Campionato Internacional Worldskills e no europeo Euroskills“.
Do día 1 ao 3 de marzo celebrouse no Ifema (Madrid) o Campionato Nacional de Formación Profesional, Spainskills 2017, organizado polo Ministerio de Educación, Cultura e Deporte en colaboración coas comunidades autónomas e as cidades autónomas de Ceuta e Melilla.
O próximo destino de Raúl Fernández Lorenzo é Abu Dhabi (Emiratos Árabes Unidos), onde representará en outubro a Galicia e España no Worldskills International (organización internacional, non gobernamental, sen ánimo de lucro, que ten como fin a promoción de competencias profesionais no marco da Formación Profesional a nivel mundial). Conta na actualidade coa participación de 52 países.
Raúl estuda o ciclo de Mecanizado no IES Politécnico de Vigo e viaxará acompañado polo seu titor do centro Francisco José Rodríguez Martínez.
O noso veciño, tras proclamarse Campión de Galicia e de España, irá agora a polo Mundial. Hai unhas horas, pletórico, afirmaba nas redes sociais que “tras un largo y duro camino de preparación… llegó la recompensa”, recoñecendo que “sigo asimilándolo poco a poco”. Con este resultado Raúl vén de anunciar que “me clasifico para participar con la Selección Española el Mundial que se celebrará en Abu Dhabi en octubre y también para el Europeo de Budapest que se celebrará en septiembre de 2018“. Agora está claro que “por delante quedan meses de duro trabajo, con el objetivo de hacer un buen papel en estas citas. Por qué no…vamos a soñar!”
