Tal e como podemos ler na web da Federación Galega de Ciclismo: “A Asociación Deportiva Fornelos de Montes fíxose co triunfo nas dúas carreiras raíñas do XIX Trofeo Comunidade de Montes das Eiras, quinta xornada puntuable da Copa Galicia de Ciclocross 2016 celebrada este sábado no concello pontevedrés do Rosal. O sub-23 Raúl Fernández conseguiu a súa primeira vitoria da temporada na proba absoluta masculina e Desiree Duarte sumou o seu segundo triunfo parcial do curso tras superar ao sprint a Irene Trabazo (Meruelo). Mauro González (Salvaterra) e Isabel Castro (Fornelos) continúan como líderes.

O Club Ciclista O Rosal organizou este evento que reuniu a 244 participantes e no que o vento, a chuvia, e como consecuncia o barro, foron gañando protagonismo. O circuíto da Praia das Eiras non ten segredos para o rosaleiro Raúl Fernández que foi profeta na súa terra. O representante do Fornelos soubo contrarrestar de inicio a aceleración de Mauro González e unha vez controlado ese primeiro ataque probou sorte en solitario.

A súa aventura rematou despois dunha pequena caída que aproveitaron o sub23 Samuel González (Salvaterra) e o elite Darío Otero (Compostelano) para darlle caza. A partir de aí comezou unha loita a tres bandas na que Fernández foi o máis forte: “Estabamos moi igualados e atacándonos. Nun deses cambios de ritmo conseguín abrir oco, xa non vin máis para atrás e tirei a tope ata meta”. Cun tempo de 59 minutos e 49 segundos o ciclista do Rosal presentouse na liña de meta con 18” de vantaxe sobre Samuel González, 26” respecto a a Darío Otero e a 33” rematou o líder absoluto Mauro González”.

¡Dende Noticias O Rosal, noraboa pola organización ao Club Ciclista O Rosal, a Raúl e por suposto tamén ao seu irmán, Mario Fernández, que conseguía o 2º posto do podium en categoría cadete!