O martes 24 de xullo, con motivo das Festas do Pilar do Rosal e tras a fantástica acollida da edición inaugural, terá lugar o II Festival Xente Xida que un ano máis organiza o grupo de música tradicional “O Trebón dos Xidos“.

Elena, Lorena, Miriam, Berta, Tania e Rebeca no Luar. (Fotos: Tremelique)

Así, “a Asociación Cultural XIDA en colaboración co Concello do Rosal e a súa Concellería de Cultura queremos presentar un festival cun escenario cen por cen con artistas femininas, artistas multidisciplinares, unha mestura de música e posta en escea que pretende abraiar e divertir a todos os asistentes”.

Tremelique, Maraghotas, Áureas e Habelas Hainas conforman o cartel “2018 en feminino” (coa participación especial de Marilucha “A Meiga”).

Habelas Hainas. (Foto: HH)

As actuacións comezarán na Praza do Calvario a partir das 20:30 horas “coa mellor música do país, gastronomía, tradición, sorteos e agasallos que se unen por unha festa grande, unha festa con raíces, por unha festa para todos os públicos, para todas as idades. Unha festa onde este ano as protagonistas serán as mulleres con moitas sorpresas para elas”.