O Atl. Novás vence en O Rosal e viaxa á Coruña
O Acanor Atlético Novás venceu esta fin de semana ao Vilatrade BM Lavadores en O Rosal por un estreito marcador de 27 a 26 goles. Os homes de Isma Martínez comezaron algo “durmidos” o choque, pois aos 15 minutos de partido mandaban os visitantes por 4 a 9.
Recuperouse o Novás para chegar ao descanso cun marcador de 13 a 12 a favor dos seus intereses. E outro tanto sucedeu na segunda mitade do encontro, xa que a falta de 10 minutos para a finalización o Lavadores tiña unha vantaxe de 3 tantos (20-23).
A figura dos “pesos pesados” rosaleiros, comandados polo capitán Manu Martínez e o lateral zurdo Germán Hermida, emerxeron finalmente no último suspiro para darlle a volta ao partido.
Esta fin de semana, en concreto o sábado 1 de abril, o Acanor Atlético Novás (5º clasificado) viaxa ata A Coruña para enfrontarse ao OAR (6º clasificado).
Mentres hai vida hai esperanza e o Novás, aínda que non o ten doado (a falta de 5 partidos está a 4 puntos do 3º e a 5 do 2º clasificado), seguirá loitando por unha praza na Fase de Ascenso a División de Honra B.
